Je, Mheshimiwa PINDA utajenga jamii jumuishi ukipata kuwa rais?

Pinda: "Nilisomeshwa kwa kuuza pumba"

Dodoma. Waziri Mkuu Mizengo Pinda ametoboa siri yake kuwa alisomeshwa kwa kuuza mahindi na pumba, na kwamba anajisikia raha kuitwa mtoto wa mkulima kutokana na sababu mbalimbali za kihistoria na uhalisia.

Pinda anayetajwa kutaka kuwania urais katika uchaguzi mkuu ujao mwaka 2015 alisema kuwa jina; ‘Mtoto wa Mkulima’, linampa faraja kutokana na ukweli kwamba wazazi wake walikuwa wakulima wa kawaida wa jembe la mkono, jambo ambalo naye alishiriki na hata sasa anaendelea na kilimo.

Chanzo: Mwananchi.

Maoni huru kwa Mheshimiwa Pinda

Sawli kwako Mheshimiwa Mizengo Pinda: Je, ukiwa rais wa nchi hii utajenga jamii jumuishi ambayo kila raia atakuwa huru kutembea popote na kufanya shughuli yoyote halali? Je, ndugu zetu albino watalindwaje ili kuhakikishiwa uhuru na haki yao ya kuishi? Na hawa wanafunzi wenye ulemavu, hasa wasioona na viziwi ambao wamekosa haki ya shule kutokana na kukosa walimu wenye taaluma ya elimu maalum nao watapatiwa walimu pamoja na vifaa saidizi?

Nakukumbusha Mheshimiwa Mizengo Pinda, kuwa chozi ulilolimwaga pale bungeni kwa machungu ya kuuawa albino liliweka alama ya kudumu moyoni mwangu kuwa wewe ni binadamu mwenye ubinadamu. Nina ombi kwako: Ikitokea umepata kuwa rais wa nchi hii, fanya mambo yaliyoonekana kuwa ni ndoto za mchana kwa watu wenye ulemavu. Hii ni pamoja na sera mfu zilizojaa maofisini kwenye halmashauri zetu nchini. Mtu mwenye ulemavu akienda kwa rejea ya zile nyaraka na sera za wenye ulemavu huambuliwa kuambiwa "wewe ndiye unajifanya unajua sheria sana?"

Kila lakheri Mheshimiwa Pinda kwenye kinyang'anyiro cha urais 2015!

Hakuna apendaye kuwa mlemavu

Hakuna mtu yeyote ambaye alikataliwa kwa kuzaliwa mweupe au mweusi wa ngozi. Hata mtu akizaliwa mweusi akachukua jukumu la kuibadilisha rangi yake ili awe mweupe jamii huwa haikubaliani na hali hiyo kabisa.

Ulemavu ni sawa na mtu kujikuta amezaliwa akiwa kabila fulani, akiwa na rangi fulani, akiwa mrefu au mfupi. Hakuna wa kumlaumu wala kujilaumu. Lakini kubwa zaidi ni kwamba dhana ya ulemavu imejengwa na jamii tu. Mitazamo yote imezalishwa na vitendo vya wanajamii.

Hivyo tunahitaji kuwa na mitazamo mizuri juu ya ulemavu na watu wenye ulemavu; kwa kuwa hatujui ni nani, na wakati gani atazaliwa na ulemavu, au atapatwa na ajali yenye kuleta ulemavu. Kuwa na mtazamo mzuri juu ya ulemavu na juu ya watu wenye ulemavu ni silaha ambapo muda wowote unapokutwa na ulemavu uweze kujikubali kwa hali, pia na watu wengine kwenye jamii waweze kukukubali na kukusaidia kwa yale utakayokuwa huwezi kuyafanya kwa sababu ya ulemavu.

Mtoto mdogo kiziwi akifundishwa lugha ya alama

Mwenye masikio na asikie ujumbe huu!